فلوسك واضحة قدّامك
من غير مجهود

إيه ده؟ كل اشتراكاتك الشهرية والسنوية في مكان واحد — نتفليكس، سبوتيفاي، الجيم، النت، أي حاجة بتتجدد لوحدها.

إزاي تستخدمه؟ ضيف الاشتراك بمبلغه ودورته وميعاد تجديده، واختار الحساب اللي بيتخصم منه. اضغط على أي اشتراك تشوف صفحته الكاملة بسجل كل الدفعات وإجمالي اللي دفعته فيه من يوم ما بدأت.

وفايدته إيه؟ الاشتراكات هي الفلوس اللي بتخرج من غير ما تحس. لما تشوف إنك دافع ٢٠ ألف في خدمة مابتستخدمهاش، بتلغيها في ثانية.

إيه ده؟ أقساطك كلها — العربية، الموبايل، الأجهزة، الوحدة — بعددها وكام فاضل.

إزاي تستخدمه؟ ضيف القسط بمبلغه وعدد الأقساط وتاريخ أول قسط، أو صوّر جدول الأقساط وأورا يقراه ويدخّله لوحده. تقدر كمان تحوّل أي مشترية كريدت لتقسيط من صفحة المعاملة.

وفايدته إيه؟ تعرف التزاماتك الشهرية الحقيقية قبل ما تلتزم بجديد — وماتتفاجئش بقسط في يوم مافيش فيه فلوس.

إيه ده؟ سقف تحطه لنفسك — للشهر كله أو لكل فئة على حدة (أكل، مواصلات، تسوّق).

إزاي تستخدمه؟ حدد ميزانية الشهر، وبعدين ميزانية لكل فئة تحب تتحكم فيها. أورا بيحسب المصروف تلقائي وبيوريك النسبة، وبينبهك قبل ما تعدّي.

وفايدته إيه؟ من غير سقف مافيش تحكّم. الميزانية هي اللي بتحوّل «صرفت كتير» لـ«صرفت ٨٠٪ وفاضل ٦ أيام».

إيه ده؟ أهداف ادخار بمبلغ وتاريخ — عربية، سفر، فرح، أو صندوق طوارئ.

إزاي تستخدمه؟ اعمل الهدف بمبلغه المستهدف، وحوّش فيه يدوي أو فعّل خصم تلقائي كل شهر من حساب تختاره. ومع ORA Max تقدر تشارك الهدف مع العيلة وكل واحد يحطّ فيه. وكمان تفعّل «الراوند-أب» فالفكة بتتحوّش لوحدها.

وفايدته إيه؟ الهدف بيدّي معنى للتوفير. بدل «بوفّر» يبقى «فاضلّي ٤ شهور على العربية» — وده اللي بيخليك تكمّل.

إيه ده؟ جمعيتك مع الأصحاب أو الأهل — بالأدوار والقبضات والأقساط.

إزاي تستخدمه؟ اعمل جمعية بقيمة السهم وعدد الأعضاء، وشارك كود أو QR والناس تنضم. تقدر ترتب الأدوار وتأكّد الدفعات، وأورا بيفكّر كل واحد بميعاد قسطه.

وفايدته إيه؟ بدل الورقة والكشكول ودوشة «مين دفع ومين لأ» — كله متسجل وواضح للكل، وقبضتك بتدخل حساباتك تلقائي.

إيه ده؟ تربط حسابك بشريك حياتك أو أي حد من عيلتك وتشوفوا فلوسكم مع بعض.

إزاي تستخدمه؟ ابعت دعوة بكود أو QR، وبعدها اختار تشارك إيه بالظبط: حسابات، ميزانية مشتركة، أهداف. وكل معاملة تقدر تخليها خاصة وتحدد أنهي تفاصيل تتخفي.

وفايدته إيه؟ البيت فلوسه واحدة. المشاركة بتنهي «انت صرفت كام؟» وبتخلي التخطيط لأهداف البيت مشترك فعلاً — من غير ما تفقد خصوصيتك.

إيه ده؟ تقرير مالي احترافي بصيغة PDF أو إكسل لأي فترة تختارها.

إزاي تستخدمه؟ اختار العملة أو الحساب من فوق، حدد الفترة ونوع التقرير (شامل، مصروفات، كشف حساب، اشتراكات، ذهب...) واضغط تصدير.

وفايدته إيه؟ لما تحتاج ورق رسمي — فيزا سفر، قرض، أو حتى مراجعة سنوية مع نفسك. كله متنسّق وجاهز يتبعت.

إيه ده؟ حاسبة زكاة المال على أصولك الحقيقية المسجّلة في أورا.

إزاي تستخدمه؟ أورا بيجمع أرصدتك وذهبك وشهاداتك وسلفك اللي ليك، يطرح ديونك، ويحسب ٢٫٥٪ لو عدّيت النصاب — وتقدر تحدد تاريخ الحول ويفكّرك.

وفايدته إيه؟ الزكاة محتاجة دقة وناس كتير بتقدّرها بالتخمين. هنا الرقم مبني على فلوسك الفعلية.

إيه ده؟ تبعتلنا مشكلة واجهتك أو فكرة تحب نضيفها.

إزاي تستخدمه؟ اكتب اللي في بالك — وتقدر ترفق صورة للشاشة. وكمان هزّ الموبايل من أي مكان في التطبيق وشاشة الإبلاغ هتفتح بصورة جاهزة.

وفايدته إيه؟ أورا بيتبني على ملاحظاتك انت بالذات — أغلب المميزات اللي جوّه دي طلبات مستخدمين.

إيه ده؟ شهاداتك وودايعك البنكية بعائدها الشهري وتاريخ استحقاقها.

إزاي تستخدمه؟ سجّل الشهادة بمبلغها والعائد الشهري وتاريخ البداية والاستحقاق، واختار الحساب اللي العائد بينزل فيه — والعائد هيتسجل دخل تلقائي كل شهر.

وفايدته إيه؟ الشهادات جزء كبير من ثروة المصريين ومحدش بيتابعها. هنا بتتحسب في صافي ثروتك، وبننبهك قبل الاستحقاق بأسبوع عشان تقرر تجدد ولا لأ.

إيه ده؟ إشعار يجيلك لما سعر الدولار أو جرام الدهب يوصل رقم انت محدده.

إزاي تستخدمه؟ اختار دهب ولا دولار، فوق ولا تحت، واكتب السعر — وأورا بيراقب كل ربع ساعة ويبعتلك أول ما الشرط يتحقق.

وفايدته إيه؟ بدل ما تفضل تفتح وتسأل عن السعر كل يوم — سيبها علينا واتصرف في اللحظة الصح.

إيه ده؟ محوّل عملات بأسعار محدّثة يوميًا.

إزاي تستخدمه؟ اكتب المبلغ واختار من عملة لعملة — والنتيجة فورية.

وفايدته إيه؟ نفس الأسعار اللي أورا بيحسب بيها ثروتك ومعاملاتك متعددة العملات، فالأرقام متسقة مع كل حاجة في التطبيق.

إيه ده؟ مصاريفك على تقويم شهري — كل يوم وكام صرفت فيه.

إزاي تستخدمه؟ اتفرج على الشهر واضغط أي يوم تشوف معاملاته بالتفصيل.

وفايدته إيه؟ بتكشف الأنماط بسرعة: الأيام اللي بتصرف فيها كتير، وبداية الشهر مقابل آخره.

إيه ده؟ خريطة حرارية بتلوّن أيامك حسب حجم الصرف.

إزاي تستخدمه؟ كل ما اليوم يبقى أغمق يبقى صرفت فيه أكتر — بصّة واحدة توريك الصورة كاملة.

وفايدته إيه؟ الرسم بيوصّل حاجات الأرقام بتخبّيها — زي إن الويكند بياكل ضعف أيام الشغل.

إيه ده؟ توقّع لرصيدك خلال ٤٥ يوم، من رصيدك الحالي والمواعيد المسجّلة: الاشتراكات والأقساط، الدخل المتكرر، السلف اللي ليها ميعاد، الادخار التلقائي، وعوائد الشهادات.

إزاي تستخدمه؟ افتحها وشوف مسار رصيدك وجدول زمني بكل بند وميعاده، وأقل رصيد متوقّع ويومه. سجّل مرتبك كدخل متكرر عشان يدخل في الحسبة.

وفايدته إيه؟ بتعرف بدري لو في يوم رصيدك هيقلّ فيه — فتتصرف قبلها بدل ما تتفاجئ.

إيه ده؟ مين واخد منك ومين انت واخد منه — بالمبالغ والمواعيد.

إزاي تستخدمه؟ سجّل السلفة بالاسم والمبلغ وتاريخ الاستحقاق، وعلّم عليها «اتسدّدت» لما تخلص.

وفايدته إيه؟ السلف بتضيع في النسيان والإحراج. هنا كل حاجة متسجلة بتاريخها، والصافي (ليك ناقص عليك) قدامك.

إيه ده؟ بحث في كل حاجة مرة واحدة: معاملات، اشتراكات، أهداف، سلف، حسابات.

إزاي تستخدمه؟ اكتب أي كلمة أو رقم — والنتايج بتتجمّع مقسّمة بنوعها.

وفايدته إيه؟ أسرع طريقة توصل لحاجة بعينها من غير ما تلف على الشاشات.

إيه ده؟ تحديات توفير قصيرة تخليك توفّر من غير ما تحس.

إزاي تستخدمه؟ اختار تحدي (زي إنك توفّر مبلغ متزايد كل أسبوع) وأورا بيتابع تقدّمك ويشجّعك.

وفايدته إيه؟ التوفير بالإرادة بيفشل، بالتحدي بينجح — لأنه بيبقى لعبة ليها خط نهاية.

إيه ده؟ مصروف كل ولد بتديه ومتابعته.

إزاي تستخدمه؟ ضيف كل واحد بمصروفه ودوريّته، وسجّل اللي بتديهوله — وتقدر تتابع سلفياتهم كمان.

وفايدته إيه؟ بيعلّمهم الحساب ويريّحك من «انت مديتنيش الشهر ده».

إيه ده؟ درجة لصحة فلوسك من ١٠٠ — مبنية على معدّل الادخار وصندوق الطوارئ والالتزام بالميزانية وعبء الالتزامات الثابتة.

إزاي تستخدمه؟ افتحها تشوف درجتك ونسبة كل محور، ونصيحة من أضعف محور، وخطة للشهر بأفعال ليها أهداف رقمية.

وفايدته إيه؟ رقم واحد بيلخّص وضعك، والخطة بتقولك تعمل إيه بالظبط عشان يعلى.

إيه ده؟ قد إيه فلوسك تكفّيك لو الدخل وقف؟ الإجابة بالشهور.

إزاي تستخدمه؟ أورا بيقسم رصيدك على متوسط مصروفك الشهري — والمستهدف ٣ لـ٦ شهور.

وفايدته إيه؟ ده أول خط دفاع قبل أي استثمار. لو التغطية أقل من ٣ شهور، ده أهم هدف تشتغل عليه.

إيه ده؟ أورا بيقترحلك ميزانية كاملة مبنية على صرفك الحقيقي.

إزاي تستخدمه؟ افتحها وراجع الأرقام المقترحة لكل فئة، عدّل اللي تحبه، واعتمدها بضغطة.

وفايدته إيه؟ أصعب حاجة في الميزانية إنك تبدأها من ورقة بيضا — هنا بتبدأ من أرقامك الفعلية.

إيه ده؟ ميزانيات للمواسم اللي بتيجي كل سنة: رمضان، العيد، المدارس، الصيف.

إزاي تستخدمه؟ اختار الموسم وحدد ميزانيته وابدأ تحوّشلها من بدري.

وفايدته إيه؟ المواسم دي هي اللي بتكسر الميزانية. لما تجهّزلها من شهرين، بتعدي من غير قروض ولا ضغط.

إيه ده؟ دخلك الثابت — المرتب وأي دخل بيتكرر (إيجار، فريلانس، عائد).

إزاي تستخدمه؟ سجّل مصادر دخلك بمواعيدها ومبالغها، وأورا بيحسب إجمالي دخلك الشهري ويتوقع نزوله.

وفايدته إيه؟ من غير ما التطبيق يعرف دخلك، كل النِسَب (التوفير، الميزانية، التوقعات) بتبقى ناقصة.

إيه ده؟ ضمانات الأجهزة والمشتريات بتاريخ انتهائها.

إزاي تستخدمه؟ سجّل الجهاز وتاريخ الشراء ومدة الضمان وصوّر الفاتورة — وأورا بينبهك قبل ما الضمان يخلص.

وفايدته إيه؟ كل واحد فينا اكتشف إن الضمان خلص بعد ما الجهاز باظ بأسبوع. هنا الفاتورة والتاريخ محفوظين.

إيه ده؟ صوّر إيصالاتك كلها مرة واحدة وأورا يقراهم وانت تراجع.

إزاي تستخدمه؟ ضيف صور الإيصالات، سيبه يقراهم، وبعدين أكّد كل واحد بضغطة.

وفايدته إيه؟ بدل ما تفتح شاشة وتصوّر وتحفظ لكل إيصال لوحده — الالتقاط منفصل عن المراجعة.

إيه ده؟ ملخّص شهرك المالية في شاشة واحدة قابلة للمشاركة.

إزاي تستخدمه؟ افتحها آخر أي شهر وشوف كام وفّرت، أكتر فئة صرفت فيها، أكتر يوم، وأكبر عملية.

وفايدته إيه؟ الحصاد السنوي بييجي مرة واحدة — الشهري بيخليك تعدّل مسارك وانت لسه في السنة.

إيه ده؟ ملخّص سنتك المالية في شاشة واحدة ممتعة — زي «راب-أب» آخر السنة.

إزاي تستخدمه؟ افتحها آخر السنة وشوف أكتر شهر صرفت فيه، أكتر تاجر، أكبر معاملة، وكام وفّرت.

وفايدته إيه؟ بتديك نظرة من فوق على سنة كاملة — وبتكشف عادات مكنتش واخد بالك منها.

إيه ده؟ قواعد بتقول لأورا: «أي معاملة من التاجر ده اتعامل معاها كده».

إزاي تستخدمه؟ من أي معاملة اضغط «اعمل قاعدة للتاجر ده» وحدد الفئة والاسم اللي يتسجل بيه والحساب والوسم. تقدر تخليها تمسك كل الفروع (زي «شيل اوت» بكل محطاتها) وتطبّقها على معاملاتك القديمة كمان.

وفايدته إيه؟ رسايل البنك بتيجي بأسماء وحشة زي «SHELL OUT MAADI 5». القاعدة بتحوّلها لـ«بنزين» بفئتها الصح — مرة واحدة وللأبد.

إيه ده؟ فئات من عندك بأسمائها وألوانها وأيقوناتها.

إزاي تستخدمه؟ ضيف فئة جديدة (زي «مصاريف الشغل» أو «هوايتي») واستخدمها في معاملاتك وميزانياتك عادي.

وفايدته إيه؟ الفئات الجاهزة مابتوصفش حياة كل واحد. لما التصنيف يشبهك، التحليلات بتبقى مفيدة فعلاً.

إيه ده؟ الصق أي رسالة بنك وأورا يحوّلها لمعاملة كاملة.

إزاي تستخدمه؟ انسخ الرسالة من تطبيق الرسايل والصقها هنا — أورا بيطلّع المبلغ والتاجر والحساب، وانت تراجعها وتسجّلها.

وفايدته إيه؟ على أندرويد دي طريقة تسجيل رسايل البنك، لأن التطبيق مابيقراش رسايلك. وعلى الآيفون مفيدة لو الأتمتة مش شغالة أو لرسالة قديمة عايز تسجّلها دلوقتي.

إيه ده؟ تتحكم في كل إشعارات أورا وتفضيلات العرض.

إزاي تستخدمه؟ حدد قبل الفواتير بكام يوم يفكّرك، فعّل التذكير اليومي بتسجيل المصاريف، وظبّط بداية الشهر وبداية الأسبوع.

وفايدته إيه؟ التذكير في الوقت الصح هو الفرق بين إنك تدفع قبل الغرامة أو بعدها.

إيه ده؟ كروت أو حسابات عايز أورا يتجاهل رسايلها تمامًا.

إزاي تستخدمه؟ ضيف آخر ٤ أرقام الكارت — وأي رسالة فيها الرقم ده مش هتتسجل خالص.

وفايدته إيه؟ مفيد لكارت الشغل أو كارت حد تاني بييجي على موبايلك — عشان مايلخبطش أرقامك.

إيه ده؟ نسخة كاملة من بياناتك تحتفظ بيها عندك.

إزاي تستخدمه؟ اعمل تصدير للملف واحتفظ بيه، وتقدر ترجّعه في أي وقت.

وفايدته إيه؟ بياناتك ملكك. النسخة بتديك اطمئنان إنك مش معتمد على حد.

إيه ده؟ كل إعدادات حسابك والتطبيق.

إزاي تستخدمه؟ من هنا بتغيّر بياناتك وباقتك والعملة الأساسية والمظهر والأمان.

وفايدته إيه؟ مكان واحد لأي حاجة عايز تظبّطها.